ТЫВА ДЫЛ ХҮНҮНГЕ ТУРАСКААТКАН ТЫВА ЧА АДАР ОЮН: БАГ АДАР ХЕВИРИ
Кайгамчык чараш болгаш ханы уткалыг байырлалывыс Тыва дыл хүнү таварыштыр республика чергелиг эр кижиниң үш адаан оюннарының бирээзи: «Тыва ча адар оюн: баг адар хевиринге» республикавыстың шылгараан болгаш тергиин адыгжыларының аразынга чаңчылчаан адаан мөөрей болуп эрткен.
Тыва эр кижиниң үш адаан оюннарының бирээзи ча адар оюн ханы уткалыг. Тоолчургу чугаалардан-даа көөр болза, тываларга ча, согун аза-буктан, багай күштерден камгалаар турган. Амгы үеде тыва ча адар оюн адыгжыларның иштики сагыш-сеткилин сайзырадыр, дадыктырар болгаш чөптүг чорукка ынак болурунга кижизидип, хей-аът киирер оюннарның бирээзи деп санаттынып турар. Чылдан чылче ча оюнунуң маргылдааларынга чоннуң сонуургалы өзүп, киржикчилер саны немежип көвүдеп турар апарган. Ол дээрге бир дугаарында, тыва кижиниң бурун өгбелерниң арттырып каан өнчүзүн хүндүлеп, ону бедик деңнелге салып, бодунуң үндезин культуразын кадагалап арттырары дээш улуг сагыш-човаашкынын салып, хумагалыг хамаарылгазын көргүзүп чорууру.
Ук мөөрейге эр адыгжылар аразынга тергииннерни таныштыраалыңар:
Бирги черни Монгуш Сылдыс, ийиги черни Оспакай Амир, үшкү черни Успун Кежик, дөрткү черни Отсур Отчутай база бешки черни Аян Борисович чаалап алганнар.
Кыс адыгжыларның аразынга бирги черни Отсур Айыраа, ийиги черни Күжүгет Мамаа, үшкү черни Монгуш Онзагай база дөрткү черни Салчак Алена чаалап алганнар.
Тыва улустуң ёзу-чаңчылдарының, аас чогаал болгаш ус-шеверлер төвүнүң ажылдакчыларының мурнундан мөөрейниң адыгжыларынга онзагай байырлалывыс Тыва дыл хүнү таварыштыр изиг байырны чедирип, аас-кежикти, ам-даа улуг чедиишкиннерни күзеп, хей-аъдыңар бедик, угаан-медерелиңер оккур, салып алган сорулгаңар кезээ шагда бүдер болзун деп йѳрээр-дир бис!
#тыва #тыва_төп #тыва_ча_адар_оюн #Центр_тувинской_культуры
